• Aneuek Mud
  • Mai 2016
  • Yusuf Dawood and Guree
  • Pelanggara
  • Bangsa Aceh Berdemo Di Jalan Raya Stockholm
Aneuek Muda1 Stockhol2 Yusuf Dawood and Guree3 Stockholm 4 Bangsa Aceh Berdemo Di Jalan Raya Stockholm 5







Acheh-Sumatra National Liberation Front (ASNLF)
Amanat Keutuha Prèsidium ASNLF
Bak Uroë Ulang Thôn Atjèh Meurdéhka Keu-41 (1976 – 2017)
4 Désémbèr 2017


Tgk Hj Yusuf Daud Waki Ketuha ASNLF



Bismillahirrahmanirrahim, Assalammu’alaikum w.w.

Njang ulôntuan peumulia bandum bansa Atjèh

Alhamdulillah pudjoë keu Po Teuh Allah SWT, njang ka neubri nikmat hudép, langkah dan raseuki keu geutanjoë bandum. Seulaweuët dan saleuëm ta peutrôh keu djundjôngan geutanjoë Rasulullah Muhammad SAW. Meunan tjit keu sjuhada geutanjoë tameudo’a sabé beu lapang kubu dan neubri sjuruga.

Hana ta thèë ka peuët plôh sa thôn umu surat peunjata keulai kemeurdéhkaan Atjèh. Dalam surat njan that djeulaih neupeutrang peukara dan alasan tuntôtan Atjèh Meurdéhka. Ulôntuan teugaih keulai, bahwa tuntôtan Atjèh Meurdéhka nakeuh sah menurôt hukôm internasional. Ulèh seubabnjan geutanjoë sibagoë generasi seunambông bèk sagai² wéh-weuh haté dalam perdjuangan njoë.

Sjèëdara bandum bansa Atjèh njang ulôntuan peumulia,

Ateuëh nan Atjèh Meurdéhka, ulôntuan peutrôk teurimong geunaséh njang that lambông keu bandum sjèëdara², njang ka neumeusôsah pajah peubeudôh keulai seumangat untôk peudong dèëlat bansa Atjèh dalam padum thôn leupah njoë.

Keudjeunaweuëb nibak tuntôtan keadaan dan masa, Prèsidium sibagoë badan legislatif dan eksekutif ka neupeudong departemèn² njang tapeureulèë untôk tapeudjak program² keureudja ukeuë njoë deungon leubèh meu-atô. Kateuntèë di sinoë peureulèë teunaga², idé², pikéran² barô, seureuta sokongan moral dan materi nibak geutanjoë bandum njang ka seupakat untôk tameudong kong dalam perdjuangan Atjèh Meurdéhka, supaja keureudja rajek dan sutji njoë meuhasé lagèë teumeukeusud.

Sjèëdara bandum bansa Atjèh njang ulôntuan peumulia,

Bék tahireuën, bahwa tantangan dan hambatan perdjuangan makén deuh njata. Bansa Atjèh sitjara sistematis djipeupok saré keudroë² deungon djisipreuëk isu² njang peugot bansa geutanjoë bitjah blah, seureuta djipeuhantjô generasi muda bansa Atjèh deungon meubagoë tjara. Miseudjih bahan narkotika, lagèë djeunèh sabu², barokon hana tom meutadeungo pih, djinoë kameusipreuëk ban saboh njan trôk u dalam gampông². Akibat salah ngui nibak ubat meubahja njoë, rusak badan dan pikéran. Leubèh nibak njan, djeut peureuloh akhlak deungon djipeulaku buët² kriminal.

Maka ateuëh dasar keupeunténgan nasional Atjèh dan untôk peuseulamat generasi muda bansa Atjèh, peujuang² Atjèh Meurdéhka neutjok sikap untôk lawan bandum buët² peuhantjô neuduëk bansa Atjèh ateuëh rhuëng dônja.

Bak uroë njang that meusidjarah njoë, ulôntuan peutrang keulai, bahwa seunambông perdjuangan njoë nakeuh tanggông djaweuëb geutanjoë bandum aneuëk bansa Atjèh, njang heut peudong dèëlat di ateuëh tanoh keuneubah éndatu droëteuh dan geutanjoë hana tameumusôh saré keudroë-droë teuh, tapi geutanjoë na seunipat dalam peukara² prinsip, njang meukaét deungon sinambông perdjuangan Atjèh Meurdéhka. Meunjo hana tamumat bak hai² njang prinsip nibak geunaréh perdjuangan, maka bèk hireuën teuh geutanjoë bansa Atjèh phang-phoë, hana meuho-saho dan hana tatu'oh pham keupeunténgan nasional Atjèh.

Keupeunténgan nasional njoë meusti keumah tapeutheun dalam dum peuë peukara, peuëkeuh sipil, politék, èkonomi, sosial, budaja dan laén². Insja Allah, liwat program² peundidékan, kaderisasi, seureuta penerangan njang hana pijôh² akan keumah tapeudong keu-keulai dèëlat bansa di tanoh éndatu teuh.

Semoga ikhtijeu² geutanjoë bandum Neuridha ulèh Po Teuh Allah SWT.

Wassalam
ttd.
Ariffadhillah
Keutuha Prèsidium



Our Local Website

Laman web resmi kami: Sekretariat ASNLF/AM Sweden

Website UN

United Nations - Laman web PBB (Perserikatan Bangsa-Bangsa)

Website Pusat

ASNLF Pusat adalah laman web resmi ASNLF/AM